اللي برجو بالدزَّان*** يعدِّي حياتو في الدَّز
لا يهنا ولا هو مطمان*** بعمرو ما يعرفش العز
دِزْ تخطف، دِزْ النَّح
دز البيدق دز الفازة
دِزْ معاية صوتي بح
عمري تعدَّى مع الدزَّازَة
***
كاللي يخدم عند الحاكم *** يبدا في الدز على بكري
ما تنسوني هاني معاكم *** تعلمت الدزة من صغري
دوسيات وخدم تتراكم *** دزْ حويجة تسلك بكري
كون فطين وعايق فاهم *** أمورك تمشيلك تجري
إفهم في فعل الدَّز
ولا تقعد مغبون تزازي
ولا تخللي روحك للزَّز
من خلطك في الكوازي
***
دِزْ تخطف، دِزْ النَّح
دز البيدق دز الفازة
دِزْ معاية صوتي بح
عمري تعدَّى مع الدزَّازَة
***
كان حصُلت في معبوكة *** نُوازل ومحاكم قدَّامك
لا يفيدك طار ودربوكة *** كانش ما تبشطر من مالك
لا وكيل يغيثك بحْرُوكَه *** تقول ربحت مشا في بالك
نازلتك تطلع مشروكة *** كي نسيت الدزة لخوالك.
فعل الدَّز فعل أَمْر،
لاهو مضارع لا ماضي
دِزْ وكُح وذوق المُرْ
دِزْ آش يهمك في القاضي
***
دِزْ تخطف، دِزْ النَّح
دز البيدق دز الفازة
دِزْ معاية صوتي بح
عمري تعدَّى مع الدزَّازَة
***
يتبع
Bravo Yé M3allem
, toujours à jongler avec les mots !!!
دز معاهم صحّة ليك
دز خير ملّي يدزّوا فيك
ههههه
حلوّة يا أزواو، هذي هي العودة إلّي نستنّاو فيها، هيّا ما تنساش باش ترجّع هاك الأرشيف
سعداء بعودتك
اللي نتمنّو انّها تكون بالثراء و الكثافة المنتظرة
:):)
و موش من قبيل : دزّان العجله
Témé: ton passage nous remet dans des instants de nostalgie et de plaisir. Content de ton retour cher ami.
BTB: Dezzit faztek ya dezzez….Ayya ettelha bina chouya. يعمل الله لللأرشيف
براسطوس ختمت يا بن عروس قريب توللي قعدة متاع قدماء محاربين ههههه. دزَّان العجلة ساعات ضروري مرحبا بيك
المعذرة ليكم الكل على الردود المتأخرة راهو غلّيت علية برودة الصيف و دزتو فيا ههههههههههه