موش يلف على الآفراك و يعبِّي بَطنه
Archive for the 'تعددية' Category
دوة و فعفعة عندها مدة قايمة على هالثلاث حروف و مشتقاتها المتعددة قعدت من بعيد نتفرج وعامل عقول سارحة، و هس على خاطري قصيد شاعر المزُّونة المتميز محمد الغزال الكثيري، قلت نبدا بيه و من بعد نرجعو لها الراغلة متاع الوطن والوطنية والوطنيين واللي ماهمش…
سوى نعيش في قصر الغنى و ابراجة
سوى عيلتي محتاجة
بلا وطـْن ما تساوي حياتي حاجة
بلا وطـْن ما نسواشـــــي *** سوى جاي في هالكون ولاّ ماشي
و مهما رقيت الفوق ما نعلاشي*** و لا هبطت لا ما تحسـِّني لواجة
بلا بيه ما نحسش بطيب معاشي*** و يتهد جاشي و الحشى و اوداجة
بلا وطن يا وطـــــــّانة ******مهما تعلـّى الفرد يرخص شانه
و مهما بنى يتقلعوا سيسانة**** يعدّيه عمره غصايصة يتلاجى
و الوطن ما يعيشش بلا شبانه*** إل يفنو ربيع العمر في منهاجه
بلا وطن فيه نكــــــدوا ******ما نقدروا ظروف الحبا نتحدوا
و مهما علت قصورنا يتهدوا*** منسج فقد الصوف و النساجة
معادن ذهبنا بلا هواه يصـدوا*** و من غير أرض الغز يفقد تاجة
يا وطن حبك ثـــــــــروة********** العطشان من منبع غرامك يروى
القرآن و رجال الصفاء و المروى*** و إيمان بيت الله من حجاجه
العريان أنت غطاه وقت الشـــروة***** تحميه من سافي الرمل و عجاجه
كم من مشى و تغــــــرب******* قاسى تقاسى شاب راسه جرّب
كل شي نجّم عوضه و تــدرب**** و كل فج قرّب من ترابه لاجه
لقى الوطن ما كيفاش وين تشرّب*** في جو ناسه و تربته و انهاجه
الوطن هو أرضـــــــك *******هو وجودك في الحياة و غرضك
هو الكرامة و الشرف و عرضـك ***و ماضيك و أولادك و سود أغناجه
هو صحتك هو دواك و مرضـــك *****و طولك و عرضك و الغنى و اخراجه
حب الوطن يستاهــــــــل ***********عمل كد متواصل صعيب و ساهل
و ضمير واعي من المناهل ناهل**** و اشبال لا طق الحلق فراجة
ما ينكره إلا العديم الجـاهل****** تداجبه لا ما فيه ما يتداجة
يعيش الوطن في كرامــة******* شامخ معزة مقدرة و شهامة
إذا الكل نفنوا عمرنا خدامة**** في كل ما يثمر يزيد انتاجه
تونس الخضراء الوطن ألف سلامة**** تعيش مسلمة مهد الحضر قرطاجة
نبع الصفاء من بيـــــرك******** و علي لا فاض الرخاء من خيرك
يمين الوفاء محال نعشق غيرك*** برّك و جوّك و البَحـَر و امواجه
ريفك و حضرك يصنعوه مصيرك**** و راعي غنم غطـّاك صوف انعاجه
بيك ينهض المتعلــــــــم *********هو النور من يضْوي الظلام إلْ ظلّم
و قلم في مشكل عويص تكلم**** في نفيعتك ما يخاف مِ الهرّاجة
و أم واعية لدق شوكتك تتألم*** بصلاحها لجيــال ما تتفاجى
ربيع الوطن ثقـــافــة******** شاعر رسم مسرح كتب بعفافة
روّاد في خفايا الخرم كشافة*** كتلة مشاعر صادقة وهـّاجة
التاريخ هم صيفته و أوصافه *****أبن رشد ما عاشش بلا صنهاجة
يعيش الوطن متصلـــــح******** اذا بخير معطى فلاحته يتسلح
كل شبر فأرضه الصالحة تتفلح*** من حد بنقردان حتى لباجة
لا فيه تبقى شايحة تتكلـــــح ******لا يترحوا و لا يكثروا هجّـاجة
يدوم الوطن و يقــــــاوم****** إذا كان فيه العدل حكمه داوم
و غنيان في فقر الزمان تـلاوم ****مدى حياتهم في زكاتهم خرّاجة
و شجعان في حقها ما تسـاوم**** اسم الوطن في فمهم ربّـاجة
يا وطن أنت خبــــــــري********** و مهد الطفولة و الشباب و وكري
انت افراحي في الحياة و صبري*** الباب الصعيب فتحتلي مبلاجة
نسمة هواك جروح قلبي تبري ****يا بحر حبي فيك شعري ناجى
يا وطن أنت الفكـــــــــرة********* أصل العقل و الذاكرة و الذكرى
و طير حي عشش في ضلوعي وكره*** و نسجت عقد الشعر من ديباجه
من ينكرك يا وطن قلبي نكره******* لا يسير لا منه الرجاء يتراجى
التدوينة السابقة برغم اللي ما كانتش بالجدية الهامة، و حبيتها تكون مدخل لبعض من شباب الدويرات و حتى من غير الدويرات باش يتعرفو على لغة هي جزء من الفسيفساء التونسةو و المغاربية، أثارت جدل كبير بالخصوص على الفايس بوك وصلت فيها التعليقات لقريب الستين تعليق. و كان هالجدل مهم لأنه طرح عدة مسائل تهم مصير هاللغة و تهم كذلك جوانب تاريخية حول أصولنا التاريخية و مسألة الكتابات اللوبية المنقوشة في عديد الأماكن في بلادنا واللي حسب بعض المختصين لتوة ما وقعش فك رموزها واستغلال المعلومات الموجودة فيها. من جهة أخرى العديد من المعلقين أثارو مسألة المحافظة على هاللغة و في هالقلم نأكد غللي القضية تبقى بالأساس موكولة بيدين الناس المتكلمين بيها بالدرجة الأولى، تبَقـَّى مسؤولية الدولة كمؤتمن على الموروث و المكونات الثقافية والتاريخية للبلاد، من جهة وواجب النخبة الأكاديمية و الباحثين في المجالات المتصلة بها الموضوع، من جهة أخرى مسؤولية كبيرة و خطيرة في نفس الوقت. في الوقت اللي عدد لا باس بيه من الباحثين “الاستعماريين” قامو في وقتهم بأبحاث و أعمال اللي ما ينجم ينكرها حد، يضهر توة و بعد أكثر من خمسين سنة من الاستقلال اللي ما اتعمل شيء للمحافظة على التنوع الثقافي و ربما بالعكس كانت المواقف و القرارات أقرب منها لطمس الكيان الأمازيغي و التحريض على اندثاره، لدرجة أنه الواحد كيف يثير هالمسألة يوللي محل تشكيك في وطنيته و عروبته و متهوم بنزعة انفصالية ومسكون بفكر “متفرنس”.
وفي الواقع المسألة ما تقتصرش على الكيان الأمازيغي وجده، ياما تتعداه لمكونات أخرى من فسيفساء بلادنا كيف الأقليات الأخرى سواء دينية والا عرقية، كيف الزنوج واليهود والأمالط و الفرنسيس والطليان و الڤريق(اليونانيين) اللي استوطنو في بلادنا و كانت عندهم الرغبة أنهم ما يفارقوهاش و يكونو من مواطنيه بأتم الكلمة، لأنهم – و بعد عدد كبير من الأجيال من الوجود في بلادنا- ما عاد عندهم حتى وجهة يقصدوها واللي تعوضلهم الوطن هذا ( حتى وإن كان عدد من اليهود توجهوا لأسرائيل على دفعات متعاقبة و كل ما صارت أزمة).
عملية التصفية المقصودة والغير مقصودة على مر السنين من الاستقلال لليوم مشات في اتجاه اللون الواحد ضد ألوان الطيف، قال أشنة يلزمنا نكونو كي دجاج المكينة: فرد لون فرد مطعم و على فرد كلمة ، فرد وجه، فرد لغة ، فرد قياس فرد سينما فرد مسرح ونغنيو على نفس الموزيكا و نصليو على فرد مذهب ووراء الإمام الواحد الأحد في وحدة قومية صمَّاء ( هي من ناحية الطرش طرشة ضربة وحدة)
على كل المسألة كبرت و من غير ما نشعر نلقاو أرواحنا ندورو ندورو ونرجعو لقلب الرحى.
نرجع للأمازيغية و للكلمات اللي اقترحهم عليكم و نعطيكم الشروح والمعاني متاعهم.
آشْلُو: إسم مذكر يجمع على إيشَلْوَنْ و معناه المزود المصنوع من جلد الماعز لحفظ الدقيق.
إِيرْجِي: إسم مذكر يُجمع على إيرْجِيوَنْ و معناه الغار المعد للسكن.
تَامْكُولْت: إسم مؤنث مقترض من العربية من كلمة المكحلة المستعملة لحفظ كُحُل الزينة.، يمكن أن يُجمع ب تيموكـَّال و إن كان عير مسموع بكثرة.
تَازْدَايْت: إسم مؤنث يُجمع على تِزْدَايين و معناه النخلة.
تَاسِيرْت: إسم مؤنث يُجمع على تِيسيرا و معناه الرحى المصنوعة من الحجارة لرحي الحبوب.
تِيُمورَا: إسم مؤنث و مفرده تامُّورت و معناه البلد
بِدَّا : فعل يِبِدْ (وقف)مُصَرَّف في الماضي لضمير المتكلم المفرد و معناه وَقَفْتُ.
أَسْوِيغ: فعل يسْوِي(شَرِبَ) مُصَرَّف في الماضي لضمير المتكلم المفرد و معناه شَرِبْتُ.
تِكَرزا: مصدر من فعل يَكْرِزْ (حرث) و معناه الحراثة.
نِمْجِر: فعل يِمْجِرْ ( حصد) مُصَرَّف في الماضي لضمير المتكلم الجمع و معناه حصدنا.
تِلوغلاغين: إسم مؤنث غي صيغة الجمع مغردُه تلوغلاغت و معناه الشـِّعْبَة.
إسافِّن: إسم مذكر في صيغة ال جمع مفرده سوف ز معناه الواد
تزقـَّا : إسم مؤنث و جمعه تُزغوين و معناه البيت المبني
آسكُوم : إسم مذكر و معناه الموثق من عود الشجر والمثبت بحائط
تِلوليوين،: إسم مؤنث في صيغة الجمع و مفرده نَلِوْلِيوت و معناه الزغرودة
إيطـَّان : إسم مذكر في صيغة الجمع و مفرده أيْدِي و معناه الكلب
تَنمِّيرت : إسم مؤنث من الأسماء التي لا جمع لها على حد علمي و معناه البَرَكَة
آنيل: إسم مذكر و يُجمع على إِينَالِن و معناه القبر.
أُڤْدَا : فعل يُڤُّدْ مصرف في الماضي لضمير المتكلم المفرد و معناه خِفْتُ.
إِيغَسْدِيسَانْ : إسم مذكر في صيغة الجمع و مفرده آغِسدِيس و معناه الضِّلْعُ و الكلمة مشتقة من كلمة إِيغَسْ و هو العَظْمُ.
تِيرُو : فعل مصرف في الماضي لضمير المؤنث الغَائب و معناه وَلَدَتْ.
أدْشِيغْ : فعل يَدْشِي مصرف في الماضي لضمير المتكلم المفرد و معناه أكلت.
يسُّوفَغْ : فعل مصرف في الماضي لضمير الغائب المفرد معناه أخرج و هو مشتَق من فعل يَْفَّغْ و الذي يعني خرج.
يِسْغِي : فعل مصرف في الماضي لضمير الغائب المفرد و معناه اشترى.
رَوْلا : فعل يَرْوَلْ مصرف في الماضي لضمير المتكلم المفرد ومعناه هربت.
كِمْزَا : فعل يَكْمِز مصرف في الماضي لضمير المتكلم المفرد ومعناه حككتُ (جلدي أو بدني)
إِسِيرِيدَنْ : إسم مذكر في صيغة الجمع من الأسماء التي لا مفرد لها على حد علمي و معناه ماء الغسيل ( الغسالة) مُشتق من فعل يِسِّيرِد أي غسل.
إبياتن: إسم مذكر في صيغة الجمع و مقرده أبيَّات و معناه العَرَبِي.
تمَاسَّا : إسم مؤنث و جمعه تَمَاسِيوِينْ و معناه نوع من الحقول الأمازيغية كالجسر أو الكاترة
رادج: ،إسم مذكر و جمعه إِرَادْجِنْ و معناه الشبكة المصنوعة من حبل الحلفاء
إيشَمْجَان:، إسم مذكر في صيغة الجمع و مفرده أشَمْجُونْ و معناه الشخص الأسود البشرة
تِزَّاد: ، فعل يِزَدْ مُصرف في الحاضر لضمير الغائب المفرد المؤنث و معناه كَالَ.
تِينِيسا: ، إسم مؤنث في صيغة الجمع و مفرده تنَاست و معناه المفتاح.
آغرُوي: ،.إسم مذكر مفرد و جمعه إِيغَرْيَانْ و معناه خشب جذع النخيل (الصَّننور)
تِيرَا : إسم مؤنث مفرد و معناه الكتابة و فعله يُورِي.
تادرصا : إسم مؤنث و جمعه تِدَرْصِيوِين و معناه ضفيرة الحلفاء .
آسِخْسِي : إسم مذكر من الأسماء التي لا جمع لها ومعناه ما يتبقى من العجين الملتصق بالبرمة بعد خَبز العيش (العصيدة.)
تِيرْكفت : إسم مؤنث و جمعه تيركيفين و معناه القافلة .
ساقِّن : إسم مذكر في صيغة الجمع و مفرده سُوغ و معناه الماجل.
آدنو : إسم مذكر مفرد و معناه الدلْو.
يِسِّيوْ : فعل مصرف في الماضي لضمير المفرد الغائب المذكر ومعناه فرش.
، آزِطـَّا : إسم مذكر وجمعه إِزَدْوِينْ و معناه المنسج.
، سيروس : إسم مذكر مفرد وجمعه إِيسوراس و معناه المَحَطْة
، يسَرْوَسْ : فعل مصرف في الماضي لضمير المفرد الغائب المذكر، ومهناه قاد
التصحيحات و الآراء المختلفة والا مناقضة مرحبا بيها
